Maribi Ugarteburu: "Epaiketa inkisitoriala da hau"

Amaitu dira Udalbitzaren aurkako auziko uztaileko lehenengo lau saioak. Eta auzipetuek balorazioa egin nahi izan dute gaur, Donostian, prentsaurrean. Hiru ideia azpimarratu nahi izan dituzte.

Lehenik, "jarduera politiko publikoei buruz" azalpenak ematen ari direla "auzitegi penal baten aurrean". Eta horrek argi erakusten duela "demokraziaren beraren lehenengo funtsa zigortu asmo duela Auzitegi Nazionalak". Epaiketa hau "epaiketa inkisitoriala" dela baieztatzeraino.

Bigarrenik, salatu nahi izan dute "Dena ETA da esamoldeak" gidatutako prozesamendua dela hau. Baina, adierazi dute epaiketan argi azaltzen ari dela "gezur handi batean oinarritu dela prozesamendu osoa".

Eta hirugarrenik, epaiketa hau "eskubide zibil eta politikoen kontrako epaiketa" dela, "biltzeko eskubidea" eta "herritarren ordezkari izateko eskubidea" urratu delako.

Fiskaltzari buruz esan dute, "Udalbiltzaren sorrera eta jarduera udal hautetsien borondatez egin zela estali nahian" dabilela, "Udalbiltza ETAren aginduetara sortu eta garatu zela erakusteko". Baina, horri eusteko ez duela "inolako froga edo argibiderik erakutsi".

Irailaren 13an jarraituko du epaiketak Espainiako Auzitegi Nazionalean, Udalbiltzaren eta bertako hautetsi edo langile ziren 20 pertsonaren kontra. Ministerio fiskalak 10 eta 15 urte bitarteko espetxe zigorra eskatua du pertsona horien aurka, eta Dignidad y Justicia elkarte ultraeskuindarrak 15 eta 23 urte bitarteko zigorrak. Horrez gain, Udalbiltzaren, Udalbiltza Partzuergoaren eta Euskal Garapen eta Kohesio Funtsaren debekua eskatzen dute bi akusazioek, 20 auzipetuen inhabilitazioaz gain.