Mario Fernandez Eusko Jaurlaritzako lehendakariorde ohi (1982-1985) eta Kutxabank-eko presidentea EAEko egungo egitura instituzionalaren alde azaldu da, "aldaketak autogobernua arrisku larrian" jarriko lukeelakoan. Izan ere, haren arabera, egitura aldatzeko Espainiako Konstituzioa bera aldatu behar da, eta hori egiteko prozesuan Espainiak estatuko autonomia erkidegoen eskumenak murriztuko lituzke hain segur. "Krisi garai honetan erkidegoei eskumenak gutxitzeko giro politikoa dago Espainian".
Jaurlaritzak dio EAEn erakundeetan zerbitzu bikoiztasun kasuak daudela, eta 400 milioi euro aurreztu daitezkeela halakoak saihestuz gero. Fernandezek aitortu du krisi ekonomikoaren aurretik "baliabide gehiegi" erabili zituztela Araba, Bizkai eta Gipuzkoako instituzioek, diru kontuak ongi zihoazela iritzita. Baina esan du arazo horrek ez duela zerikusirik erakundetze sistemarekin, "baizik eta kudeketarekin".
Eusko Legebiltzarrean gaiari buruzko batzordean mintzatu da Kutxabankeko burua, gaur goizean.
