"Azken ondorioetaraino" eraman nahi du Javier Maroto Gasteizko alkateak kaleko arroparekin igerilekuetara sartzeko debekua: "Higiene arrazoiek ez dakite ezer aurreiritziez".
Gasteizko udal igerilekuetako hainbat erabiltzailek salatu zuten emakume ugari jantzita eta hijabarekin sartu direla uretara. Udalak atzo jakinarazi zuenez, hori debekatzeko agindu die igerilekuetako zaintzaileei. Gaur, Marotok Radio Euskadin nabarmendu du arauak "denentzat berdinak" direla eta ez dagoela "salbuespenik".
"Arauak dio ezin dela udal igerilekuetara arropa guztiak jantzita sartu, eta are gutxiago hijabarekin. Arauak berdinak dira denentzat", esan du Marotok. Halaber, salatu du debekua erabiliko dutela elkarte batzuek hura kritikatzeko, "zentzuzkoa" den neurri bat babestu beharrean.
Gaineratu du udal igerilekuetara joatea ez dela "betebehar" bat: "Norbaiti ez bazaizkio gustatzen udalak igerileku publikoez dituen arauak, irtenbide erraza du: ez joatea".
