Marta Vera kontseilariak dio Osasunbideak itunpeko arreta behar duela

Lana optimizatzeko Osasunbideak erietxe pribatuekin kontzertuak ezarri behar dituela adierazi du Marta Vera Nafarroako Gobernuko Osasun kontseilariak. Gobernuak osasun kontzertuak egiteko erabilitako eredua «eztabaidagarria» dela aitortu du, baina gaineratu du horrek ez duela esan nahi osasungintza pribatizatu denik. Atzo Nafarroako Parlamentuan eginiko agerraldian egin zituen Verak adierazpenok. Osasunbidea kontzertu plana prestatzen ari dela jakinarazi du kontseilariak. Hala, aitortu du Kontu Ganberak eginiko aholkuek «lagundu» dutela. Era berean, kontrol ganberak esan bezala, itunpeko arretarako alternatibak aztertzen dituen plan berezirik ez dagoela aitortu du. Verak ez zuen baloraziorik egin nahi izan itunpeko osasunak dakarren gastuaren inguruan.