Hilabete baino gehiago da Iruñeko Martxoaren 8ko Batzordeak eskatu zuela manifestazioa gaur egiteko baimena. Espainiako Gobernuaren Nafarroako Ordezkaritzak eman egin zion, zirkulazio arazoak zirela eta ibilbidean zenbait aldaketa eginez. Iragan astelehenean, ordea, manifestazioa debekatu egin zuen, gaur hauteskunde bezperako gogoeta eguna delako. Espainiako Gobernuaren Nafarroako Ordezkaritzaren esanetan, Madrilen hartutako erabaki batean oinarritu zuten Iruñeko debekua: Espainiako Gobernuaren Madrilgo Ordezkaritzak martxoaren 8ko manifestazio bat debekatu zuen gaurkoa gogoeta eguna delako.
Debekua jaso ostean, Iruñeko Martxoaren 8ko Batzordeak administrazioarekiko auzi helegitea aurkeztu zuen asteartean, eta Nafarroako Auzitegi Nagusiak herenegun jakinarazi zuen erabakia: auzitegiak babestu egin zuen Espainiako Gobernuaren Nafarroako Ordezkaritzak ezarritako debekua. Nafarroako Auzitegi Nagusiaren esanetan, jakina da manifestazioen helburua ez dela hauteskundeetarako kanpaina egitea, edo bozak lortzea, baina «protesta izaera» dutela dio. Epaiaren arabera, martxoaren 8an «bidezko gizarte eta politika aldarrikapenek boto eskubide aktiboarekin talka» egiten dute, «ezohiko egun horretan». «Biltzeko eskubidea eta bozkatzeko eskubidea kontrajartzen dira, eta Auzitegiak bigarren eskubidearen gailentzearen aldeko hautua egin du», nabarmendu du.
IA EHUN URTEKO OSPAKIZUNA. «1910ean Clara Zetkin militante sozialistak eskatuta Emakumeen Nazioarteko Eguna onartu zenetik ia ehun urte igaro dira», gogoratu du Iruñeko Martxoaren 8ko Batzordeak adierazpen batean. Eta Espainiako Gorteetarako hauteskundeak martxoaren 9an jarri izanak ezin dituela baldintzatu martxoaren 8ko ekitaldiak. «Maiatzaren 1eko manifestazioa apirilaren 30ean ezarriko al lukete? Maiatzaren 2an hauteskunde orokorrak deitzera ausartuko al lirateke? Ez ote dirahirugarren planoan geratu berriz ere emakumeon eskubideak, desioak, interesak?», galdetu du Batzordeak.
Salatu du hauteskundeek ezin dituztela emakumeen eskubideak baldintzatu, eta alderdi politikoek «ustez» egiten duten emakumeen eskubideen defentsa «hipokrisia» besterik ez dela. Iruñeko Martxoaren 8ko Batzordeak gaurko mobilizazioen garrantzia nabarmendu du: «Askorentzat borroka eta ospakizun eguna da. Kalea okupatzeko eguna, historikoki ukatu zaigun espazioa eskuratzeko eguna. Urte guztian bizitzako eremu guztietan zor zaigun protagonismoa aitortzen zaigun egun bakarra».
41 taldek elkartasuna adierazi diote Iruñeko Martxoaren 8ko Batzordeari: besteak beste, LABek, CGTk, Andreak, Emakume Internazionalistek, Askapenak, Itoizko Solidarioek, Sortzen Ikasbatuazek, IAk eta Nafarroako SOS Arrazakeriak.
############
DeIaLDIaK
GaurAlgorta (Bizkaia): Manifestazioa, 19:00etan, Teilletxetik abiatuta.
Azpeitia (Gipuzkoa): Manifestazioa 19:30ean eta ekitaldia plazan.
Baiona: Elkarretaratzea 17:30ean, herriko etxearen aurrean. Ondoren emazte baten izena emanen diote karrika bati.
Arte erakusketa Polo Beyries auzotegian, 18:30ean. Aides elkarteak hiesari buruzko informazio mahaiak jarriko ditu.
Barañain (Nafarroa): Kontzentrazioa, 12:30ean, Udal plazan.
Bilbo: Manifestazioa, 19:30ean, Arriaga antzokiaren paretik. Leloa: Guk erabakitzen dugu, abortatzeko eskubidea.
Donostia: Kontzentrazioa 11:00etan Bulebarrean eta manifestazioa 19:00etan, Bulebarretik abiatuta. Leloa: Ez gara inorenak, gure bizitza gurea da.
Durango (Bizkaia): Manifestazioa 19:00etan, Andra Maritik abiatuta.
Elorrio (Bizkaia): Kontzentrazioa 12:00etan plazan.
Gasteiz: Kontzentrazioa 12:00etan Correosen eta manifestazioa 20:00etan, San Anton plazatik abiatuta. Leloa: Feministok eraldaketarako borrokan! Gure gorputzak gureak dira.
Iruñea: Manifestazioa 19:00etan, Gaztelu plazatik abiatuta.
Ondarroa (Bizkaia): Kontzentrazioa 12:00etan Alamedan.
Tolosa (Gipuzkoa): Kontzentrazioa 13:00etan Triangulo plazan.
Zarautz (Gipuzkoa): 11:30ean bizikleta martxa eta 12:30ean manifestazioa.
Zornotza (Bizkaia): Kontzentrazioa 12:00etan.
Asteartea, martxoaren 11
Noain (Nafarroa): Montse Bordaren eta Sagrario Azkonaren erakusketen inaugurazioa, 19:00etan.
Asteazkena, martxoaren 12a
Bilbo: Emakumeen Elkarteen III. Jardunaldia, Eusko Jaurlaritzaren egoitzan (Kale Nagusia 83).
Donostia: Genero indarkeria eta emakume etorkinei buruzko hitzaldiak, SOS Arrazakeriak antolatuta, Doctor Camino liburutegian, 19:00etan. Hizlariak: Maria Antonia Caro eta Mikel Mazkiaran.
Osteguna, martxoaren 13a
Barakaldo (Bizkaia): Mahai-ingurua 18:30ean San Vicente kultur etxean. Hizlariak: Nekane Jurado, Maite Martin eta Rakel Rodriguez.
############
«Maiatzaren 1eko manifestazioaapirilaren 30eanezarriko al lukete?»
iruñeko martxoaren 8ko batzordea
############
