Juanjo Agirrezabala EAko parlamentariak gaur mehatxuak jaso dituzten Bilduko karguei elkartasuna adierazteko eskatu die beste alderdiei Eusko Legebiltzarrean. Heriotza mehatxuak jaso dituzte Pedro Barrio Lasarte-Oriako alkateak eta Ane Karrere Andoaingoak eta Iñaki Errazkin Azpeitiako alkate ohi eta Martin Garitano ahaldun nagusiaren taldeko buruak; horrelako jazarpena salatzeko beharra azpimarratu du Agirrezabalak, "biktima edonor delarik ere".
Horretarako proposamena aurkeztu du Legebitzarrean Agirrezabalak. "Bakea inoiz baino gertuago dagoen honetan, inoiz baino garrantzitsuagoa da erakundeek edozein jazarpen eta indarkeriaren aurkako mezua bidaltzea". Proposamenean, gainera, Herrizaingo Sailari eskatu dio mehatxuak egin dituztenak idenfitikatu eta epaitzeko behar diren neurriak bultzatzeko.
