Eusko Jaurlaritzak mendekotasun legeak eskaintzen dituen laguntzei eutsi egin nahi die. Espainiako Gobernuak datorren ostiralean lege hori aldatuko duen arren, Gemma Zabaleta Jaurlaritzako Gizarte Politika sailburuak aurreratu du bere gobernuak Euskal Autonomia Erkidegoko eskumenak baliatuko dituela mendekotasunari laguntzei eusteko.
Gipuzkoako Foru Aldundiak, berriz, iragarri du ez dituela mendekotasun legearen murrizketak ezarriko. Espainiako Gobernuak legeari "heriotza ukaldia" eman nahi diola azaldu du gaur goizean Ander Rodriguez Gipuzkoako Gizarte Gaietarako diputatuak.
Laguntzak ez kentzearen alde egiteaz gain, Zabaletak mendekotasun legeari “galgarik” ez jartzeko asmoa berretsi du. Hiritarrei emandako laguntzaz gain, lana sustatzeko balio handia duen arloa dela gaineratu du.
Espainiako Gobernuak ostiralean aldatuko du mendekotasun legea, eta Ana Mato Osasun ministroak aurreratu zuen zerbitzuak lehenetsiko dituztela laguntza ekonomikoekin gainetik. Horrez gain, zerbitzuengatik gehiago pagatzeko eskatuko du. Bihar bilera egingo dute, Madrilen, dependentzia arloko autonomia erkidegoetako buruek.
