Mendillorri jomugan dago egunotan, auzoan izandako agerraldiaren ondorioz. Ehundik gora positibo atzeman dituzte Iruñeko auzo horretan, eta PCR proba masiboak egiten ari dira osasun langileak. Kutsatzeen pisua, baina, auzoko gazteen gain erori da, Alde Zaharreko gaueko aisialdiarekin lotu baitute agerraldia, eta 17 eta 28 urte bitarteko gazte guztiei proba egiteko dei egin diete. Halaber, gazteek eta auzoko hainbat elkartek komunikabideen partetik pairatu behar izan duten «zirku mediatikoa» salatu dute.
Atzo arratsaldean, probak egiteko txanda zuten 500 gazte inguruk auzoko institutuan, eta hainbat gaztek deialdia egin zieten auzotarrei berekin batera hara hurbiltzeko, beren pribatutasuna babeste aldera. Deialdirako hainbat kartel zabaldu zituzten Auzoaren kriminalizazioari ez, ez gara zuen zirku mediatikoa lelopean. Izan ere, komunikabideek argazkiak atera ahal izateko deialdia zegoen arratsaldean. Auzotarren ezinegonaren ondorioz, ordea, bertan behera utzi zuen deialdia Nafarroako Gobernuak.
Goizean, agerraldia egin dute gazteek eta hainbat elkartek, eta gazteek "arduraz" jokatu dutela nabarmendu dute: aztarnen ikerketan lagundu dutela eta probak egiteko prest agertu direla adierazi dute.
Geroa Bairen gaitzespena
Geroa Bai ere gaitzetsi egin du auzoan jasaten ari diren «jazarpen kanpaina», bereziki gazteak. Alderdia kezkaturik azaldu da egunotan geratzen ari diren kutsatzeekin, eta arduraz jokatzea galdegin die herritarrei. Halere, azaldu du gazteei ere arduraz jokatzea dagokiela baina Mendillorrin jasaten ari diren tratua «neurrigabea» dela. Era berean, auzoko gazteek izan duten jarrera goraipatu du alderdiak, eta gazteek auzoaren alde egiten duten lan «irmoa» nabarmendu du.
