Metroa ordaintzeko akordioa egin dute Jaurlaritzak eta Bizkaiko Aldundiak

Bilboko metroa zabaltzeko aurten egin beharreko lanak ordaintzeko akordioa lortu dute Eusko Jaurlaritzak eta Bizkaiko Diputazioak, eta amaitu dute iragan astean hasitako ika-mika. Metroa zabaltzeko lanak Basaurin, Getxon eta Santurtzin dituzte egitekoak aurten, eta Bizkaiko Diputazioak proposatu zuen Bizkaiko Garraio Partzuergoaren aurrekontuan 127 milioi euroko zorra onartzea, metroaren lanak ordaintzeko. Ordea, Eusko Jaurlaritza aurka zegoen; haren arabera, 61 milioi euroko zorra baino handiagoa izatea legez kanpokoa litzateke.

Bizkaiko ahaldun nagusi Jose Luis Bilbaok eta Eusko Jaurlaritzako Garraio sailburu Iñaki Arriolak aurkeztu dute akordioa gaur. Azkenean, 61 milioiko zorra onartuko dute partzuergoaren aurtengo aurrekontuetan, Jaurlaritzak nahi bezala. Ordea, 127 milioi eurora iristsiko dira, falta den dirua Jaurlaritzak berak eta Diputazioak jarrita. Kreditua eskatuko dute horretarako.

Garraio partzuergoak127 milioi euro jartzen ez bazituen Diputazioak jarriko zuela gainerakoa iragarri zuen Jose Luis Bilbaok. Azkenean, ez du partzuergoak jarriko, baina ezta Diputazioak soilik ere. Jaurlaritzaren eta bien artean ordainduko dute falta dena.