"Ezker Batua Euskadin birsortzeko" batzarra egin du IU-Ezker Anitzak Leioan, EHUn, eta Mikel Arana eusko legebiltzarkidea hautatu dute koordinatzaile, espero zen bezala. Erabateko babesa jaso du. EAEn "bosgarren espazioa" bete nahi dute, EAJ, Bildu-Amaiur, PSE-EE eta PPren ondoren.
"IU-Ezker Anitza ezkerreko erakundea da, antikapitalista, errepublikarra eta federala da", adierazi du Aranak, eta Euskal Herrikoa, baketsua eta internazionalista dela aipatu du.
Leioako batzarrean izan da Cayo Lara IUko koordinatzailea. Ezkerrekoen batasuna aldarrikatu du, "gizarte orekatuagoa eta justuagoa lortzeko".
Iaz EB barruan zatiketa sortu ondotik eratu dute IU-Ezker Anitza.
