Josu Uribetxebarriaren senide eta lagunek deituta, manifestazio jendetsua egin dute Arrasateko kaleetan, preso gaixoak aske uzteko eta sakabanaketa amaitzeko eskatzeko.
Eguerdiko 12:30ean irten da manifestazioa, Udaletxeko plazatik, Giza eskubideak, Irtenbidea. Bakea. Preso gaixoak etxera. Sakabanaketa amaitu lelopean. Martxaren buruan, preso ohiaren senide eta lagunak, tartean, haren anaia Javier Uribetxebarria. Manifestarien artean ziren, besteak beste, Sortuko presidente Hasier Arraiz eta EH Bilduko eledun Unai Urruzuno.
"Uribetxebarria ez da hil; hil egin dute. Minbizia diagnostikatu ziotenean aske utzi izan balute, bizirik jarraituko zukeen", salatu dute komunikatuan manifestazio amaieran, eta gehitu: "Noiz arte jarraituko du Espainiak giza eskubideak urratzen?".
Josu Uribetxebarria preso arrasatearra joan den ostiralean hil zen, gaixotasun luze baten ondorioz. 2005ean diagnostikatu zioten gaitza, baina 2012ko udazken arte ez zuten aske utzi. Bitarte horretan preso gaixoen borrokaren ikur bilakatu zen.
