Ikastolen aldeko atzoko jaian milaka lagunek parte hartu zuten Portugaleten. Aspaldiko partez agertu zen eguzkia, eta hura lagun zutela egin zituzten askok eta askok ibilbideko 7,5 kilometroak, ibilaldi polita, Portugalete, Sestao eta Santurtzi zeharkatuz. Asti Leku ikastolaren eraikin berria egiteko da jasotako dirua.
Aurtengoak Espainiako hezkuntza erreforma aurkeztu berriaren aurkako mezuak jaso ditu. Jaurlaritzako Hezkuntza sailburu Cristina Uriartek erreformarekin "atzera" egin dezatela eskatu du, eta "hezkuntzaren euskal itunean" aurrera egiteko beharra nabarmendu du Iñigo Urkullu lehendakariak. EAJko ordezkariek egindako adierazpenez gainera, EH Bildurenak eta PSE-EErenak ere eman ditu festak. "Irmotasuna" eskatu diote erreforma aplikatzeak ekarriko lukeen atzerapausoa saihesteko.
