Bi kamioik ireki dute Zumarraga-Urretxun Arcelor Mittal ez ixteko eskatzeko egin duten manifestazioa. Jendetza atera da kalera, herriko langileen defentsan. "Arcelor ez itxi" eta "Hemen gaude enpleguaren alde" ahots bakarrean abiatu dira beharginak eta haien familiak manifestazioan. Izan ere, Mittalek altzairuaren krisiak Zumarragako Arcelor eta Sestaoko ACB ixtera behartu duela dio. Hori ez dela egia uste sindikatuek.
@Xabier_Martin hauxe da Mittal une honetan Zumarragan. pic.twitter.com/PeSXbZinTt
— Xabier Martin (@Xabier_Martin) 2016(e)ko martxoak 19
Txalo egin diete herritarrek langileei bide ertzetik, eta "jo ta ke, irabazi arte" oihukatuz erantzuten dute beharginek emozio betean. Izan ere, arriskuan daude haien lanpostuak. Indiako zuzendaritzak Arcelor Zumarraga itxi eta 325 langileetatik gehienak Asturiasera bidali nahi ditu. Langileek, baina, ez dute joan nahi, eta manifestazioan esan dute beste lanpostu bat hartzea ez dela aukera bat. "Mittal errudun, esplotatzailea", egin dute oihu.
Manifestaziora joaterik izan ez dutenek ere babesa helarazi diete. Hainbat merkatari, esate baterako, kanpora atera dira manifestazioa pasatzean, eta txalo egin diete.
@berria Zumarragako dendariak denda atarietan txaloka eta emozio betean asko, Arcelorren aldeko martxa pasatzean. pic.twitter.com/bTPw4OxOFi
— Xabier Martin (@Xabier_Martin) 2016(e)ko martxoak 19
Politikari batzuk ere izan dira Zumarraga-Urretxuko manifestazioan. Esate baterako, han izan da Denis Itxaso Gipuzkoako Diputazioko Kultura sailburua, eta Pello Urizar EH Bilduko bozeramailea.
Zumarragako lantegiak egiten duen produkzioaren parte bat kentzeko asmoa du Arcelorrek, eta lantaldea —300 langile baino gehiago— lekualdatzeko aukera ireki du. Sestaoko ACB lantegiaren jarduna geldirik du jadanik multinazionalak. Zumarraga- Urretxuko langileek gaur hasi dituzte protestak, eta asteazkenean jarraituko dute: greba egingo dute, eta Gasteizen elkarretaratzeko asmoa dute, Eusko Jaurlaritzaren aurrean, gobernuari ardura eskatzeko. Hilaren 26an ere protesta egingo dute Gipuzkoako Foru Aldundiaren aurrean, Markel Olanoren gobernuari "inplikazioa" exijitzeko.
