Javier Maroto Gasteizko alkateak mintzatokien jarduna arautzeko udal ordenantza bat jarri du mahai gainean. Telefonia eta Internet zerbitzuak eskaintzen dituzten saltokiek bete beharreko baldintzak jasotzen ditu dokumentuak, eta horien funtzionamendua mugatzea du helburu, Marotok berak azaldu bezala: "Betiko merkataritza babestea nahi dugu".
Mintzatokiak kaleetan "ez ugaritzea" da Gasteizko Udal Gobernuaren asmoa; hori horrela, hainbat baldintza gogortu die mintzatokiei. Besteak beste, saltoki barruan tabakoa erretzea eta edari zein janariak kontsumitzea galaraziko die erabiltzaileei. Baldintza horiek bete ezean, 1.500 eurotik 3.000 eurora arteko isunei aurre beharko diete, arau-hauste oso larri gisa zehaztua baitago. Horrez gain, bi mintzatokiren artean 600 metro baino gehiagoko distantzia egon beharko da.
Mintzatokien aurrealdean, berriz, material gardenak erabiltzea proposatzen du dokumentuak, kaletik saltokiaren barnealdea ikus dadin. Ikusgarritasuna oztopatu dezaketen iragarki komertzial edo bestelako afixak jartzea, oro har, debekatzen ditu Marotoren udal ordenantzak.
