19:00etan zeuden deituta protesta egiteko, besteak beste, Arrasaten, Antsoainen, Bergaran, Bilbo Zaharran, GAsteizen, Mundakan eta Zeuanurin.
19:30ean, berriz, Abadiñon, Eibarren, Elgoibarren, Bilboko San Inazion, Donostian (Intxaurrondo), Durangon, Galdakaon, Ibarran, Lekeition eta Ondarrun.
20:00etan, Algortan, Arbizun, Barakaldon, Bilbon (Indautxun, Deustuan, Uribarrin, Santutxun, Alde Zaharrean eta Otxarkoagan), Gernika-Lumon, Hernanin, Iruñean, Oiartzunen, Sopelan eta Zumaian
Baionan ehunka lagun
Ehunka lagun elkartu dira Baionan goizeko atxiloketak eta 04/08 epaiketa salatzeko. 18:30ean izan behar zuen elkarretaratzeak, baina beranta pixka batekin hasi da Aurore Martin eta Haizpea Abrisketa iritsi arte itxaron dutelako —Madrildik Baionara bidean ziren bi auzipetuak—. Hamasei atxilotuak askatu eta 35ak hobengabetzeko eskatu dute Alice Leizagezahar EELVko kideak eta Claude Larrieu NPAkoak elkarretaratzearen deitzaile guzien izenean. Martin eta Abrisketak ere hartu dute hitza; goizeko atxilotuei elkartasuna adierazi eta errepresioaren gainetik borrokan jarraitzeko deia luzatu dute.
Arbizun jendetza
Arbizun herri batzar informatiboa egin dute, udaletxeko batzar aretoan. Jendea sartu ezinik gelditu da, ia bostehun lagun bildu baitira. Guardia Zibila kanpoan zegoen eta, elkarretaratzea egiteko baimenik ez zenez, atxiloketak salatzeko plazaren inguruan bilkura txikiak egin dituzte —gehienez, 19 lagunekoak—. Fran Balda Arbizun atzeman dute, goizean.
Tentsioa LABen Bilboko egoitza atarian
19:00etan bota du LAB sindikatuaren kontuak txioa: "Kanpoan zegoen emakume bat arrastaka eraman dute egoitzara Ertzainek. Barrura sartu dute". Bilboko egoitza atariko giroa gaiztotzen ari da denborak aurrera egin ahala. Guardia Zibila egoitza barruan dago oraindik eta Ertzaintzako hiru furgoneta agertu dira arratsaldean. Ertzainak jarri dira kanpoan elkarretaratutako dozenaka lagunen aurrean.
