Herriz herriko mobilizazioak egingo dituzte iluntzean, Sortuk deituta, Auzitegi Nazionalak presoen eskaerak aztertzeko bezperan. Amaia Izko bozeramaileak eginiko adierazpenetan, Sortuk beharrezkoa ikusten du euskal preso politikoen eskubideen aldeko borroka indartzea; "mobilizazio sozialen bitartez, babes eta presio politiko eta instituzionala indartuz" aldarazi nahi dute espetxe politika.
Auzitegi Nazionalaren aldetik presoen aldeko erabakirik ez du espero Sortuk: "Pentsa daiteke erabakia aldez aurretik idatzia dagoela Madrilgo gobernuaren eskutik, alegia, orain artekoan jarraitzea, euskal presoen eskaerei bizkar emanez eta horien senitarteko eta lagunei eragiten zaien kaltea handiagotuz.
Etxerat presoen senide eta lagunen elkarteak, ordea, presoen helegiteen "onarpena besterik" ezin du espero: "Senide eta lagun bezala onar dezakegun erantzun bakarra. Aldeko erantzun bat aurrerapauso garrantzitsua litzateke sakabanaketa bukatzeko".
