Senideei deitu die arratsaldean Xabat Moranek, aske geratuko dela esateko. Hala azaldu du haren amak Twitterren, eta gaineratu du Teruelerantz abiatzekoak zirela berehala gaztearen bila joateko. Bergoi Madernaz eta Marina Sagastizabal ere libre irtengo dira. Maiatzean zigortu zituzten, Ibon Esteban, Igarki Robles eta Ainhoa Villaverderekin batera.
Segi gazte erakundeko kide izatea leporatuta zazpi gazteri ezarritako sei urteko espetxe zigorra murrizteko aukerari bide eman dio Auzitegi Goreneko fiskalak, eta epaimahaiaren esku utzi du erabakia. Aiala Zaldibar, Ainhoa Villaverde, Ibon Esteban, Igarki Robles, Xabat Moran, Marina Sagastizabal eta Bergoi Madernaz zigortu zituen Espainiako Auzitegi Nazionalak maiatzean, eta ordutik preso daude. Gaur aztertu dituzte Gorenean gazteen defentsek jarritako helegiteak.
Espainiako Zigor Kodean berriki eginiko aldaketa batzuk oinarri hartuta egin dute eskaera defentsako abokatuek. Terrorismo delituen kasuan zigortutakoei leporatzen zaizkien egitateak “larritasun eskasagokoak” badira, zigorra gradu bat edo bi murritz daiteke. Fiskalak onartu du aukera hori badagoela, baina hori zehaztea Alberto Jorge Barreiro epailearen esku utzi du.
Defentsak zigorra bi gradu murrizteko eskatu du, “larritasun eskasekoak” direlako eta “indarkeriarik gabeko” egitateak leporatzen dizkietelako zigortutako zazpi gazteei. Jaione Karrera eta Iker Urbina abokatuek, halaber, azpimarratu dute gazteak zigortzeko erabilitako frogak ez direla egokiak eta nahikoak; besteak beste, inkomunikazio egoeran polizia aurrean eginiko deklarazioetan oinarrituta daudelako eta gazteek torturak salatu zituztelako epaileen aurrean.
