Abiadura handiko trenaren proiektuaren "zulo beltza" salatzeko, protesta martxa bat antolatu du Mugitu-k ostiralerako Donostian, egun horretan Eusko Jaurlaritzak Miramar jauregian egingo duen urte politikoko lehen gobernu kontseilua dela-eta.
"Euskal Y-aren zulo beltz beldurgarria" eramango dute Miramarrera, hain zuzen "azpiegitura-lan handi hori aurrekontuak, natur-ondareak eta jendartearen premiak asetzeko ezinbestekoak diren baliabideak amaigabe irensten dituen zulo beltzik handiena" bilakatu dela salatzeko. 11:00etan abiatuko da martxa Bulebarreko kioskotik.
Mugitu-k susmoa azaldu du Lezo-Gaintxurizketan Plataforma Logistikoa eta Kontxako pasealekuaren azpitik metroa eraikitzeko egitasmoak "berehala inposatzea erabaki" duela Jaurlaritzak, horrelako "zulo beltz txikiagoak masiboki sortuz".
"Bistakoa da herritarren arteko edonolako eztabaidari eta erabakietan partehartze publikoari ateak itxi nahi dizkiela", ohartarazi du mugimenduak.
