Hamabost urte iragan dira 1999ko abuztuaren 20an Sevillako Munduko Atletismo Txapelketan bi giraldillak euskal presoak Euskal Herriratzea eskatu zutenetik, eta orain aldarrikapen hori bera mundu mailako beste kirol txapelketa batera heldu da. Atzo gauean, euskal presoen eskubideen aldeko ekintzaile batzuek Munduko Saskibaloi Txapelketan, Bartzelonan, Eslovenia eta AEBen arteko partidan eskatu zuten euskal presoak Euskal Herriratzeko.
[Youtube]http://youtu.be/XURtsA9xlSs[/Youtube]
Telebista irudiek aldarrikapena jaso ez bazuten ere, ekintzaileek presoen eskubideen aldeko banderola eskuetan hartuta egin zuten aldarrikapena, eta horietako batek kantxara iristea lortu zuen, BERRIAk jaso dituen argazkietan ikus daitekeen bezala; besteek harmailetatik egin zuten. Egunkari honek jakin duenez, segurtasun zerbitzuek ekintzaileak identifikatu ostean aske geratu dira horiek.
Munduko Saskibaloi Txapelketa Espainian ari da jokatzen aurten, eta atzokoa final-laurdenetako partida zen. Euskal Herrian ere jokatu ziren lehen faseko partida batzuk, eta atzokoa Katalunian jokatu zen, Palau Sant Jordi pabiloian. Segurtasun zerbitzuek ekintzaileak kantxatik eta harmailetatik atera ostean, normal-normal jarraitu zuen partidak.
