Nafarroa Bai: «Murrizketa bat da osasun sistema bera»

Azken hilabeteotako murrizketek Nafarroako Osasun Departamentuan izan duten eraginari buruz azalpenak ematera agertu zen atzo Marta Vera kontseilaria Nafarroako Parlamentuan. Ekainean 132 milioi euroko murrizketa onartu zuen Nafarroako Gobernuak, eta neurri horrek Osasunbideari eragin diola ukatu du parlamentarien aurrean. Veraren azalpenak ez dituzte ontzat jo talde guztiek. Nafarroa Baiko ordezkari Asun Fernandez de Garaialdek argi eta garbi erran dio kontseilariari: «Osasun sistema bera da murrizketa bat». Fernandez de Garaialderen ustez, osasun zerbitzuaren eredua bera aldatu beharko luke Nafarroako Gobernuak: «UPNk eredu misto baten alde egiten du, pribatizazioari atea zabalduz; herritarrek, ordea, doako zerbitzua behar dute, eta kalitatezkoa». Bilduk eta Ezkerrak ere salatu dute Osasunbidearen egungo bidea, eta martxan jarritako aldaketek egoera okertu baino ez dutela eginen azaldu dute. Bere tesiari eutsi dio Marta Verak, eta hartutako neurriak babestu ditu. Osasunbidean lanaldia luzatzeak, adibidez, kalitateari on eginen diola erran du.