Euskadi Irratian egin diote elkarrizketa Uxue Barkos Nafarroako Gobernuko presidenteari. Bertan, esan du indarrean dagoen legealdiko agendan ez dagoela Hego Euskal Herriko lau herrialdeak batzea; horrek ez du esan nahi, ordea, "helburu politikoei eusten ez zaienik".
Araba, Bizkai eta Gipuzkoarekin harremanak "normaltzeak leku berezia" izango du Iñigo Urkullu Eusko Jaurlaritzako lehendakariarekin egingo duen lehen bileran. Izan ere, hogei urtean harreman horiek "ez dira normalak izan", Barkosen ustez, eta "Nafarroako gobernu ezberdinei" egotzi die horren ardura.
Barkosen esanetan, bi erkidegoek aukera dute zerga politikan eta Kontzertu Ekonomikoaren nahiz Itun Ekonomikoaren defentsan elkarlanean aritzeko, "gobernu zentralaren erasoak kontuan hartuta". "Arazo teknikoak gainditutakoan" ETB Nafarroan ikusi ahal izango dela ere iragarri du: "Ez dut aurreikusten 2016an ETB Nafarroan ez ikustea".
Gobernua babesten duten alderdien arteko desadostasunez galdetuta, Barkosek azaldu du Geroa Bai, EH Bildu, Ahal Dugu eta Ezkerraren arteko harremanak onak direla. Aitortu du desadostasunak dituztela, eta iragarri etorkizuneko "erronkei" begira ere izango dituztela.
