Nafarroan tren lasterraren bidea egiteko epeak argitzeko eskatuko dio Nafarroako Gobernuak Espainiako Gobernuari. Hala adostu du gaur PSNko ordezkariekin egin duen bileran.
Luis Zarraluki Nafarroako Gobernuko Sustapen kontseilariak joan den astean onartu zuen Nafarroan 70 kilometro eskas izango dituela AHTak, eta ez duela loturarik izango ez Euskal Y-arekin, ez Zaragozarekin.
PSNk kudeaketa txarra egitea egotzi zion orduan UPNren gobernuari. AHTaren egoerari buruzko kezkak eraginda egin dute gaur arratsaldeko bilera.
Tren lasterra osorik, Zaragozatik Euskal Y-arekin lotura egin arte, da garrantzitsua, bi alderdietako kideen esanetan: "Nafarroak osorik eraiki nahi du korridorea, eta Estatuari eskatuko dio behin betirako eraikitzeko epeak zehazteko".
Yolanda Barcina Nafarroako Gobernuko presidenteak Roberto Jimenez PSNko idazkari nagusiari eskaini dio "indarrak batzea". Espainiako Gobernuarengana elkarrekin joatea ere proposatu dio, Jimenezek ukatu duen arren; ministerioarekin biltzea gobernuari dagokiola esan du PSNko idazkariak.
Nafarroako Gobernuak lortzen badu Madrilek epe eta kronograma zehatzak jartzea, Jimenezen esanetan, PSNk babesa emango dio Barcinaren gobernuari, "AHTa eztabaidatu ezin den kontua baita, garapena dakarrelako".
