Nafarroako aldaketaren alde agertu dira Iruñean

Eguraldi txarra eta hotza ez dira oztopo izan Hamaika Bil Gaitezen eta Ezker Soberanista Eraikitzen taldeek deituriko manifestazioan parte hartzeko. Bi mila pertsona inguru bildu dira, elurrari eta euriari aurre eginez Aldaketa sozial eta politikoaren alde, bat egin dezagun lelopean Nafarroaren Eguna "aldaketa sozial eta politikoaren aldeko aldarri" bihurtzeko. 17:00etan abiatu da manifestazioa, Iruñeko Golem zinemetatik.

Hainbat politikari ezagunek parte hartu dute. Besteak beste, ezker abertzaleko Xanti Kiroga eta Txelui Moreno bertan egon dira, baita EAko Koldo Amezketa ere. Manifestazioa Gaztelu plazan bukatu da, eta deitzaileek aldaketa politikoaren aldeko manifestua irakurri dute; Bakartxo Ruiz Hamaika Bil Gaitezenen taldeko kideak euskaraz, eta Yolanda Duval Ezker Soberanista Eraikitzeneko kideak gaztelaniaz. EAri, Aralarri eta ezker abertzaleari "ausart izateko" eskatu diete eta "egoeraren maila berean" egoteko. "Aldaketa gizarte eragile, sindikatu eta alderdi politiko abertzale, progresista eta ezkertiar guztien elkarlanetik landu" behar dela gaineratu dute.

Bidean independentziaren aldeko oihuak eta euskal presoak Euskal Herrira ekartzearen aldeko aldarriak entzun dira. Manifestazioa PSNren egoitzatik pasatu denean "PSOE=GAL" eta Rubalcabaren kontrako garrasiak entzun dira.

Bestelako Nafarroaren beharra

Manifestazioaren bezperan deitzaileek aldarrikatu zuten "abenduaren 3a gure herriarentzat aldaketa sozial eta politikoaren aldarrikapenean indarrak bateratzeko eguna" izan behar dela. "Ikuspegi abertzale, aurrerakoi eta ezkertiarretik, bestelako Nafarroaren beharra irudikatzeko".