Joseba Compains Nafarroako Amaiur koalizioaren Senaturako hautagaia kolpatu egin du bart Espainiako Poliziak Iruñean, Iturrama auzoan azaroaren 20ko hauteskundeetako kartelak jartzear zela.
Bart hasi da Espainiako Kongresurako eta Senaturako hauteskunde kanpaina, eta Iruñean gauerdian Amaiurren kartelak jartzeko zortzi lagun bildu ziren, Compainsek esan duenez. Baina polizia asko ikusi zituzten inguruetan, eta une horretan kartelik ez jartzea erabaki zuten; gerorako laga zuten eginkizuna. Ordu erdira Poliziaren auto bat haiengana hurbildu zen eta Compains geratu zuten: honen arabera, hiru kolpe eman zizkioten aurpegian. Halaber, poliziek zortziei esan zieten bakoitzarentzat bala bana zutela gordeta.
