Nafarroan espetxe berria "berehala" ireki dadila nahi dute —Iruñerrian ari dira egiten—, baina kartzela politikari buruzko eskumenik ez. Hala esan du Roberto Jimenez (PSN) Nafarroako Gobernuko lehendakariorde eta Barne kontseilariak, krisiagatik "hau ez baita unerik egokiena horretarako".
Patxi Zabaleta NaBaiko bozeramailearen galderari erantzunez egin ditu adierazpenok Jimenezek. "Hau ezin da izan autogobernu handiagoa zeinek duen jakiteko lehiaketa". Ondorioz, lehendakariordeak uste du "erantzukizunez" ari direla jokatzen. Haren arabera, Nafarroak bere gain hartuko lituzke espetxe berriko barne kostu batzuk.
Zabaletak PSNri eskatu dio aldarrika dezala espetxe politikaren eskumena. "Izan ere, eskumenak eskatzeak ez du esan nahi egonkortasunaren aurkakoa denik; horren aldekoa da, gauzak ondo egiten badira. Gainera, eskumen hori ez aldarrikatzea foru hobekuntzaren kontra doa".
NaBaiko eledunak esan du Iruñerriko espetxe berriko lanak bukatuta daudela, "baina badirudi Espainiako Gobernuak euskal presoak ez gerturatzeko dagoela oraindik ireki gabe".
