Espainiako Auzitegi Gorenak arrazoia eman dio Euskalerria irratiari. Nafarroako Gobernuak 1998. urtean Euskalerria irratia kanpoan utzi zuen irrati lizentzien banaketan. Legalki emititzeko baimenak Net 21 eta Nafarroako Unibertsitate pribatuko irratiari eman zitzaizkion. Helegitea aurkeztu zuen orduan Euskalerria irratiak, eta bitan arrazoia eman zion Nafarroako Auzitegiak. Auzitegi horren epaia berretsi du orain Espainiako Auzitegi Gorenak.
2006. urtean egin zuten berriro lehiaketa, eta Nafarroako Gobernuak beste behin utzi zuen kanpoan Euskalerria irratia. Espainiako Auzitegi Gorenaren epaiak esan nahi du 1998. urteko lizentzia banaketara egin beharko dutela atzera. Albistea pozarren hartu dute Iruñerriko euskarazko irratian. “Hamabost urte gaztetu gara”, esan du Euskalerria irratiko Mikel Bujandak.
