Hezkuntzako lan deialdietan hautagaiak bi zerrendatan —euskaldun elebidunak eta erdaldun elebakarrak— segregatzeko lege proposamena onartu du Nafarroako Legebiltzarrak. PSNk aurkeztu zuen egitasmoa, azaroan, eta oposizioko gainontzeko taldeen babesa jaso berri du osoko bilkuran —UPNrena eta PPrena—, baina baita lauko gobernuari eusten dion talde batena ere: Ezkerrarena.
UPNk ezarritako zerrenda bereizien sistema legez bermatuko du arau horrek; hortaz, oposizioetan, hautagai elebidunek aukeratu egin beharko dute zein hizkuntza adarretan sartu: euskarazkoan ala gaztelaniazkoan; eta lanpostu guztietara aurkeztu nahi badute, bi azterketa gainditu eta birritan egin beharko dute euren programazioaren defentsa.
