Nafarroan "aldaketa ekonomiko, sozial eta politikoa" bultzatzea du helburu batzar horrek, eta Iñaki Justes eta Ainara Oiaga bozeramaileek eman dute atxikimenduen berri. Haiekin ziren EH Bilduko Adolfo Araiz, Podemos Ahal Dugu-ko Hector Fernandez eta Equoko Alberto Labarga.
Justesek gogorarazi du "aldaketaren aldeko sentsibilitate politiko guztietako gizabanakoek" manifestu bat adostu zutela 2013an. Hori horrela, alderdiek atxikimendua adierazteak esan nahi du hiru indar politiko horiek konpromisoa agertzen dutela "Nafarroan aldaketa ekonomiko, politiko eta sozialaren alde elkarlaneko gobernu edo oposizio formula bat sustatu eta garatzeko".
Horrez gain, Justesek uste du atxikimendu horrekin alderdiak prest daudela "aldaketaren aldeko mobilizazio bateratu, zeharkako eta barneratzaileetan" parte hartzeko.
Araizek engaiamendua azaldu du hamalau ardatz horiek "aldaketaren gobernura" eramateko, gaineratuz EH Bilduk "lehen egunetik" egin dituela bere ardatz horiek. Fernandezek, berriz, nabarmendu du "beharrezkoak" direla "eztabaida eta topaguneak". Labargak azpimarratu du batzarrak "kolektibo ezberdinetako pertsonak saretzen" asmatu duela.
