Euskararen alorrean ere aldaketarako gogoa agertu zuten herritarrek, apirilaren 25ean Anaitasuna kiroldegian egindako ekitaldian. Horixe nabarmendu du Kontseiluak Iruñean. Aldaketa horren aldeko jarrera eskatu die Kontseiluak Nafarroako Gobernua osatzeko elkarrizketetan ari diren taldeei. Herrialde horretan hizkuntza politika errotik aldatu behar dela berretsi du Paul Bilbao idazkari nagusiak. "Gobernu berriak hizkuntza politika berria egin behar du", erran du.
Hori egiteko bidea zein den azaldu du Bilbaok, eta Kontseiluak aipatutako lau zutabeak ekarri ditu gogora: marko juridikoa aldatu; plangintza egin; baliabideak zehaztu hizkuntzaren normalizazioa gauzatzeko; eta, azkenik, euskararen inguruko orain arteko "diskurtso zitalak" bazter uzteko eskatu du Bilbaok. "Gobernuak hizkuntzari buruzko diskurtsoa aldatu behar du". Kontseiluko kideek ez dute bilerarik egin gobernua osatzeko negoziatzen ari diren taldeekin. Hauteskundeen aurretik, hala ere, haien proposamenak jarri zituzten aldaketaren alde agertu ziren taldeen esku. "Begi onez hartu zituzten proposamen horiek", azaldu du Bilbaok.
Hizkuntza politika ez dela egun batetik bertzera egiten argi duela erantsi du Kontseiluko arduradunak. Hala ere, haien proposamenak "egingarriak" direla uste du Bilbaok. Hedabideetan, administrazioan eta bertze hainbat esparrutan hizkuntza normalizazioaren aldeko urratsak egiteko programa jarri dute mahai gainean.
