Ezker Batua Berdeakeko aholkulari Jose Navasek esan du EBren zatiketa dagoeneko "errealitate bat" dela , eta Mikel Arana koordinatzaile nagusiari leporatu dio erantzukizuna.
Hala ere, onartu du "dibortzioa bada bide bakarra, era baketsuan, errespetuz eta istilu gehiagorik gabe" ematea nahi duela.
Navasek onartu du une honetan EB "buruzagirik gabeko erakundea" dela, aholkulariek estatutuen markoan jarraitzen badute ere koordinatzailea "hortik kanpo" dagoelako.
Mikel Aranari zuzendu zaio, salatzeko "frankotiratzaile" bihurtu dela, eta EB likidatzea helmuga hartuta gogor saiatzen ari dela. Baina lasai agertu da "legea gure alde dagoelako" eta Arana delako "legez kanpo" jokatzen ari dena. Navasen ustez Arana parlamentuko eztabaidetatik ihesi dabil, eztabaidak EBren barruan sortzeko.
Baieztatu egin du Llamas Arabako EAJrekin elkartu zela, baina "ez zen karguez eta izenez hitz egin", eta gertatutakoa "gaizkiulertua" dela argitu du.
