NBEren Giza Eskubideetarako Goi Mandatariak Frantzian burkiniaren erabilera debekatu nahi duten herriei eskatu die horrelakorik ez egiteko, neurri horiek ez dutela segurtasuna hobetzen eta Frantziako musulmanak estigmatizatzen dituela argudiatuta. Joan den ostiralean Frantziako Estatu Kontseilua agertu zen debekuaren kontra. Rupert Colville agentziaren bozeramaileak Estatu Kontseiluaren ebazpena betetzeko eskatu die, eta berehala kentzeko debekua.
"Segurtasuna ez hobetzeaz gain, erlijio intolerantzia eta estigmatizazioa bultzatzen dute, batez ere emakumeena". Gaineratu du Colvillek debekuarekin lortu den gauza bakarra tentsioa handitzea izan dela, eta muturreko jarrerak borrokatzeko eta aurreikusteko saiakerai kalte egin dietela.
"Burkinia daramana ezin da beste baten jarrera bortitzen arduradun izan", argudiatu du, eta azpimarratu du ez dela neurririk hartu behar hondartzan pasieran dabiltzan emakumeen kontra edo "eroso sentitzen diren jantziarekin bainatu nahi dutenen kontra". Nabarmendu du debekuak batik bat emakumeei eta gazteei eragiten diela eta modu horretan euren autonomiari kalte egiten zaiola, nola jantzi nahi duten independenteki erabakitzeko gaitasuna ukatuz.
