Euskal Herriko bakearen aldeko konferentzia humanitarioa 09:00etatik 13:00era bitartean egingo dute ekainaren 11n, Frantziako Asanbleako Victor Hugo aretoan. Bake Bideko eta Giza Eskubideen Ligako kideez gain, aurkezpenean izan dira, besteak beste, Colette Capdevielle eta Sylviane Alaux parlamentariak eta ekimena babestu duen parlamentari batzordeko kideak. Baita Baionako deklarazioa izenpetu zuten eragileak ere.
Nazioarteko Harreman Taldea Parisko bake konferentzian izango da, @BakeBidea-k iragarri duenez http://t.co/e5I7miTcgZpic.twitter.com/wymehjnBZO
— Berria.eus (@berria) May 21, 2015Bertan jakinarazi dutenez, Pierre Joxe Frantziako Barne ministro ohiak eta Nazioarteko Harremanetarako Talde osoak hitza hartuko dute konferentzian. Konferentziaren bidez bake prozesuan "pausoak ematen ahal dituzten pertsonak sentsibilizatzeko" borondatea azaldu du Capdeviellek. Zehatzagoa izan da Alaux; espero du konferentziak Frantziako Gobernuari egitea interpelazioa.
Louis Joinet jurista eta NBEko Giza Eskubideen Batzordeko aditu independente ohia, Marc Gentillini Frantziako Gurutze Gorriko presidente ohia eta Anaiz Funosas Bake Bideko lehendakaria izango dira konferentziaren buru. Hainbat parlamentarik babestu dute ekimena; Alaux eta Capdeviellez gain, Francois de Rugy, Cecile Duflot, Jean-Luc Bleunven, Frederique Espagnac, Paul Giacobbi, Jean- Christphe Lagarde, Jean Lassalle, Jean Jacques Lasserre, Noel Mamere eta Paul Molacek.
Parisen erantzunik eza
Agerraldian, Jean-Rene Etxegarai Baionako auzapezak oroitarazi du Baionako adierazpenaz geroztik ez dutela Frantziako Gobernuaren partetik erantzunik izan, eta azaldu du horregatik eginen dutela Parisen hurrengo bake konferentzia.
Pierre Joxez gain, Raymond Kendall, Gerard Kelly, Brandon Hamber edo Pierre Hazanek parte hartuko dute, besteak beste.
Konferentzia bake prozesuaren azken lau urteetako egoera aurkezteko eta gatazkaren ondorioez aritzeko unea izanen da, zehazkiago biktimen eta presoen ingurukoa. Hartara, gatazken konponbidean adituak diren pertsonak eta gatazkek zuzenki hunkitzen duten jendea ere present izanen dira haien esperientzia ezagutzera emateko asmoz.
