'Parte hartze politikorako eskubidearen alde' manifestua, hain zuzen, Sortu alderdia legeztatzeko exijitzen duena gero eta sinadura gehiago biltzen ari da nazioarteko jende ezagunen artean.
Martxoaren 14an ezagutarazi ziren manifestuarekin bat egin duten lehenbizikoen izenak. Orduan, besteak beste, Raul Zelik, Michel Collon eta Belen Gopegui idazleak, Javier Sabada eta Xose Manuel Beiras katedradunak, Guillermo Toledo aktorea, Carlos Taibo eta James Petras unibertsitateko irakasleak eta Heinz Dieterich analista politikoa ageri ziren; orain, besteak beste, Noam Chomsky katedraduna eta Cuauhtemoc Cardenas Mexikoko lehendakarigai ohia batu zaizkie. Berrehun sinadura baino gehiago bildu dituzte dagoeneko, Europan eta Amerika osoan.
Ezker abertzalearen legeztatzea eta «diskriminazio politikoaren amaiera» eskatu dute manifestuaren bitartez, parte hartze politikoaren eskubidearen alde dauden nazioarteko hainbat pertsona ezaguneko talde horrek. Alderdien legea arbuiatu dute, ezker abertzalea «politikatik kanporatzeko tresna» delako. Halaber, Euskal Herriaren independentziaren eta sozialismoaren alde egitea «bidezkoa eta beharrezkoa» dela dio manifestuak.
