"Gure munduak etsai komun bat du: COVID-19 birusa", esan du Nazio Batuen Erakundeko idazkari nagusi Antonio Guterresek. Izurriari aurre egiteko, munduko gatazka guztiak gelditzeko eskatu du.
NBEko buruak gogoratu duenez, gerran murgilduta dauden, osasun sistemak suntsituta eta populazioaren zati handi bat errefuxiatuta dauzkaten herrialdeak dira kalteberenak izurriaren aurrean.
"Gelditu gatazka guztiak. Utzi mesfidantza eta gorrotoa. Isildu armak, gelditu artilleria eta aire erasoak. Hil edo bizikoa da hori egitea". Su-etenak baliagarriak izango dira laguntza garraiatzeko, eta diplomaziari aukera emateko. "Gerraren gaitza amaitu behar dugu, eta gure mundua suntsitzen ari den birusaren aurka borrokatu. Eta hori gatazka guztiak geldituz hasten da, leku guztietan. Orain".
