Larunbatean iraganen da Baionan Giza Eskubideak-Konponbidea-Bakea leloarekin eginen den manifestaldia. Joan den larunbatean, Ipar Euskal Herriko 61 auzapezek, 5 Herri eta Hiri Elkargotako lehendakarik, 205 herri kontseilarik eta 5 parlamentarik izenpetu zuten Ni ere banoa lelopean, Bake Bideak eta 24 gizarte eragilek zabaldu deia.
Azpimarratzekoa da, Kostalde Aturri Hiri elkargoko 4 auzapezek izenpetu dutela deia, hots, Jean Rene Etxegarai Baionako auzapez eta Hiri Elkargoko lehendakariak, Michel Veunac Miarritzeko auzapezak, Claude Olive Angelukoak eta Francis Gonzalez Bokalekoak. Peiuko Duhart Donibane Lohizungo auzapez eta Hego Lapurdiko Hiri Elkargoko lehendakaria ere agertzen da izenpetzaileen artean.
Berrikuntza ere ikus daiteke barnealdeko herri elkargoetatik. Maider Behotegi Bidaxuneko Herri elkargo burua eta Pascal Jocou Hazparneko lurraldekoa ere dei egileen artean baitira, Beñat Arrabit Garazi-Baigorri Elkargoko lehendakariarekin batera.
Horrez gain, ekainaren 3an, CFDT, CGT, ELB, FSU, LAB, Solidaires eta UNSA sindikatetako kideek ere, larunbateko manifestazioan parte hartzeko deia egin zuten.
Berritasunen artea, joan den maiatzaren 21ean, Euskal Herriko gazte eragile desberdinek egin zuten prentsaurrekoa izan zen. Bertan, Gazte Sozialistak, MoDem alderdi zentristako Gazte Demokratak, Aitzina, Ernai, ELB gazte, Euskaldun Gazteria, Ikasle Abertzaleak eta Euskal Herria Zuzenean festibalako gazteek euskal presoen eskubideen eta bake prozesuaren alde eginen den manifestazioa sostengatzen zutela adierazi zuten eta gazteek manifestazioan parte hartzeko deialdi bateratua egin zuten.
Azkenik, Nazio Batuen Erakundeko Giza eskubideen komiteko lehendakari ordea den Jean Ziegler-ek ere, larunbaterako manifestaziora joateko deia egin du.
