Atzo iluntzean bildu ziren Nazio Batuen Erakundeko Segurtasun Batzordeko kide iraunkorrak —Errusia, AEBak, Erresuma Batua, Frantzia eta Txina—, eta, ordubete geroago, emaitzarik gabe amaitu zuten bilkura. Herrialdeetako ordezkariek ez zuten ekarpen berririk egin; ez zen halakorik espero, Errusiak eskatuta bildu baitziren bostak.
Abuztuaren 21ean Damasko kanpoaldean izandako eraso kimikoari zein erantzun eman aztertzea zuten helburu atzoko bileran. Kideek beto eskubidea dute Segurtasun Kontseiluan, eta, beraz, bostek jarri behar dute ados akordio bat egiteko.
Txinak eta Errusiak baztertu egin dute Sirian esku hartze militar bati ekiteko aukera, baina gaitzetsi egin dute arma kimikoen erabilera. Errusiak matxinoei egotzi die erasoaren ardura.
