Odon Elorza PSE-EEko diputatuak bere alderdiari Eusko Legebiltzarrean PPrekin duen ituna "premia handiz" hausteko eskatu dio, akordioak "dagoeneko ez duelako inolako zentzurik". Patxi Lopez PSEko idazkari nagusiak PPren botoei esker lortu zuen Jaurlaritzako lehendakari izatea 2009an, baina Elorzak dio ituna haustearen ondorioz ez litzatekeela derrigorrean legealdia amaitutzat eman beharko.
Dena dela, PSEko diputatuak aitortu du "etikagatik eta sinesgarritasun demokratikoagatik" hauteskundeak aurreratu egin beharko lituzkeela Lopezek, baldin eta legebiltzarreko gehiengoak hala eskatuko balio.
PPren aldetik "irainak" jaso dituztela salatu du Elorzak, "ahoa ez zabaltzeko mehatxuak" ere jasotzen dituztela dio, eta uste du horregatik moztu beharko lukeela PSEk harremana popularrekin, "formalki" hautsi ere. Krisiari aurre egiteko orduan bi alderdiek "alde handiak" dituztela gogoratu du, bidenabar.
EAEko aurreko bozak 2009ko martxoaren 1ean egin zituzten, eta EAJk irabazi zituen. 80.000 botoko aldea kendu zion bigarren alderdiari: PSEri.
Elorzaren arabera, "herri proiektu bat, bizikidetza eredu bat eta garapen eredu bat" behar dira, eta PSEk berriro EAJrekin "harremanak normalizatu" beharko lituzke.
