Harrera beroa egin diete gaur Lorentxa Gimon eta David Gramont berriki aske geldituriko euskal presoei. Martxoaren 1ean atera zen Lorentxa Gimon Roazhongo espetxetik (Bretainia), hamahiru urteren ondotik. Baldintzapean utzi dute aske, 1991tik pairatzen duen Chronen gaitzari aurre egin ahal izateko. Espetxetik atera berritan ez zioten harrera publikorik egin, lehentasuna haren osasun egoera izanik. Gaur, ordea, Gramontekin batera izan da Basusarrin (Lapurdi).
Gramont joan den astelehenean utzi zuten aske, Juantxo Esnalekin batera. Andaluzia komandoko kide izatea egotzita hemezortzi urte pasatu zituzten biek espetxean.
Ehun lagun inguru bildu dira Gimon eta Gramont preso ohiei ongietorria egiteko Basusarrin. Bertzeak bertze bertsolari, txalapartari eta dantzariek hartu dute parte ekitaldian.
