Osasun egoera onean aurkitu dute atzo arratsaldetik Saioa mendian (Nafarroa) galduta zebilen 38 urteko eskiatzaile iruindarra, 38 urteko O.M. gizonezkoa. Suhiltzaileek, Foruzaingoak, Guardia Zibilak eta galdutakoaren lagunek osatutako taldeak aurkitu dute.
Atzo 18:30ean jaso zuten abisua Nafarroako Larrialdetarako Agentzian eta segituan hasi zituzten bilaketa lanak, baina emaitzarik gabe. Gaur goizean zortzi eta erdietan, eguna argitu duenean, ekin diote berriro bilaketari.
0.M. beste hiru lagunekin zebilen atzo arratsaldean iraupeneko eskia egiten Saioan, baina laino itxiaren ondorioz lagunen arrastoa galdu zuen. Lagunek eman zuten desagertzearen berri. Eskuko telefonoaren bidez galdutako eskiatzailarekin harreman jarri ahal izan zuten adiskideek zein larrialdi zerbitzuetako kideek, baina ezin izan zien zehaztu non zegoen. Gauean zehar hainbatetan jarri dira telefonoz harremanetan, baina, azkenean, bateria agortu zaio.
Eguraldia oso txarra da Saioa inguruan, eta horrek bilaketa lanak zaildu ditu.
Mendia
Onik aurkitu dute Saioan galdutako eskiatzaile iruindarra
Atzo arratsaldean galdu zen lainoaren ondorioz beste hiru lagunekin iraupen eskia egiten ari zela. Suhiltzaileek, Foruzaingoak, Guardia Zibilak eta eskiatzailearen lagunek parte hartu dute bilaketan.
Iruzkinak
Ez dago iruzkinik
Ordenatu
