Orain arteko entzierrorik azkarrena egin dute Victoriano del Rio ganadutegiko zezenek. Bi minutu eta hamasei segundotan iritsi dira zezen plazara.
Taldea joaldunak aurrean zituela atera da Gaseko eskortatik. Santo Domingoko aldapan zezen beltz batek aurrea hartu die eta korrikalariak ekiteko keinuak egin ditu behin eta berriro. Zezena bakarrik joan da Mercadereseko bihurguneraino. Han hesiaren aurka talka egin du eta beste hiru anaiek harrapatu dute. Laurok ziztu bizian jarraitu dute Estafeta gora arriskua eta izua eraginez lasterkarien artean.
Taldea asko luzatu da eta Telefonicara luze-luze eginda iritsi da, ziztu bizian. Kalejoian lasterkari franko erori da eta pilaketa egon da. Plazara aurretik lau zezen sartu dira eta atzetik beste bi zezen beltzak eta joaldunak. Arazorik gabe plazako ukuilura sartu dira.
Bi adarkatu egon dira, korrikalari bat Santo Domingo adarkatu dute, gerrian. Bigarrena berriz, Mercaderesen, adarra sartu diote eskuineko besoan. Beste bost lasterkari ere eraman dituzte erietxeetara kolpatuta.
