Ondarroako (Bizkaia) Kamiñaldeko bizilagunek ohartarazi dute oraindik luizi arriskua dagoela. Kaltetutako familien bozeramaile Aiert Etxanizek gaitzetsi du Bizkaiko Aldundiak mendi hegalaren arrisku maila apaldu izana, lanen arduradun den geologoaren irizpideen aurka. Etxanizen arabera, arriskua gutxitzeak lanak etetea ekarriko luke, obrak berriz ere esleitu beharko liratekeelako.
Aurreikuspenen arabera, 2017ko martxoan bueltatuko lirateke kaltetuak euren etxebizitzetara, baina esleipen berriak atzeratu egingo luke. Horrez gain, eguraldi txarrek etxebizitzak are gehiago kaltetuko dituela ohartarazi dute: «Ura eta lurra filtratzen ari dira etxeetan, euriaren ondorioz». Martxoaz geroztik daude euren etxebizitzetatik kanpo.
