Hiru urte dira Gregorio Ordoñezen hilketaren sumarioa itxi zutela, baina haren hilketaren 20. urteurrenean, Espainiako Auzitegi Nazionalak berriro auzia ireki egingo duela iragarri dute hainbat hedabidek. Hilketa hura egotzita zigortu zituzten Valentin Lasarte, Juan Ramon Carasatorre eta Xabier Garcia Gaztelu. "Haiek eskuak odolez zikindu zituzten, baina inoiz ez zaie aurpegirik jarri hilketa agindu zutenei", esan zuen atzo Polloeko omenaldian Consuelo Ordoñezek.
Ordoñezen senitartekoak "ETAko ukiezinen" bila joango dela azpimarratu du: "Nire anaia hil zutenean ETAren buruzagi zirenak, Herri Batasuneko Mahai Nazionaleko eta KASeko kideak".
Omenaldian hartu dute parte EAEko PPko presidente Arantza Quirogak, Jaime Mayor Orejak eta Maria San Gilek, besteak beste.
