Bigarren aldiz uda honetan, ebolaren aurkako protokoloa martxan jarri du Osakidetzak. Sestaon (Bizkaia) bizi den 38 urteko gizonezko baten sintomak ikusita, Basurtuko erietxera eraman zuten atzo; analisiek, ordea, baztertu egin dute ebola izatea. Malaria du, eta gaixotasun hori sendatzeko tratamendua ematen hasi dira.
Sortzez nigeriarra da gizona, baina Sestaon bizi da. Nigeriatik itzuli zen duela zenbait egun, eta sukarra eduki du geroztik. Osasun zerbitzuekin harremanetan jarrita, Basurtura eraman zuten astearte iluntzean, ebolaren aurkako protokoloa aktibatuta. Ohatila batean atera zuten bere etxetik, 19:00ak aldean.
Osakidetzak bi zentro prestatuak ditu ebola kasuak izan daitezkeenentzat: Basurtuko erietxea Bizkaian, Donostiakoa, Gipuzkoan. Osasunbideak Iruñeko Ospitale Gunean du prestatua lekua.
