11:30ean zen biltzekoa Legebiltzarreko Osasun Batzordea, besteak beste, transplanteen gaia aztertzeko. Bilkura, ordea, bertan behera utzi behar izan dute, EH Bilduk eta alderdi sozialistak uko egin baitiote parte hartzeari.
Oposizioko bi alderdi nagusiek leporatu diote EAJri batzordea "Jaurlaritzaren propagandarako tresna huts" bilakatu izana, eta salatu dute eurek mahai gainean jarritako gaiei buruzko eztabaidak behin eta berriz atzeratu dituztela. Horren adibide gisara Bilduk gogoratu du joan den irailean osasun arloko sindikatu guztien agerraldia eskatu zuela, mahai sektorialaren berri emateko, baina bost hilabeteren ondoren zain jarraitzen dutela.
Ez da lehen aldia bi alderdiok halako salaketa bat egiten dutela. Bilduk gogorarazi du Jaurlaritzaren eta oposizioko taldeen egitasmoen arteko "oreka" behin baino gehiagotan eskatu badute ere gobernuak bere proiektuei soilik egin izan diela tokia.
