El Pilar ganadutegiko zezenek entzierro oso azkarra eta bizia egin dute. Baturik atera dira Gaseko eskortatik baina Santo Domingoko aldapan bi zezen beltzek taldearen gidaritza hartu dute. Udal plaza luzaturik baina elkartuta iragan dute adardunek.
Mercaderes kaleak eta Estafetak bat egiten duten bihurgunea arazorik gabe pasa dute zezenek baina kale horretan gaztain koloreko zezena aurretik jarri da eta sekulako abaila hartu du. Harrezkero, bakarrik egin du lasterka eta hainbat korrikalari kolpatu eta eraman ditu aurretik bain Estafetan eta baita Telefonicako zatian ere.
Plazara bakarrik sartu da baina atzetik heldu zen adardun saldoarekin batera ukuilura sartu da.
Ez da adarkadarik egon eta zazpi korrikalari eraman dituzte erietxera, guztiak kolpeak hartuta eta traumatismoekin.
