Oso entzierro azkarra

Ukuiluko atea ireki dietenetik Mercadres eta Estafeta arteko bihurgunera arte taldean joan dira sei zezenak eta joaldunak. Alboetara begiratzen zuten, baina ez dira desbideratu.

Bihurgunean sortu dute lehen arrisku unea. Sei zezenetatik bost erori egin dira, eta haietako bat atzera begira —Mercaderes aldera— altxatu da. Bazirudien korrika hasi behar zuela, etorritako bidetik, baina bi joaldun iritsi dira momentu hartan, eta zezen plaza aldera eraman dute.

Bakarrik zen ordurako zezen hura, eta halaxe egin ditu zezen plazara arteko kilometroak. Beste zezen bat ere geratu da atzean Estafetan. Beraz, lau zezen joan dira aurretik, pixka bat atzerako beste bat, eta atzerago seigarrena.

Izugarrizko abiada hartu dute zezenek Estafetan, eta kalearen erdi aldean bi lagun erori egin dira. Zezenek zapaldu egin dituzte, eta zezenetako bat ere erori da. Erori den zezen hori da bidea bakarrik egin duen bosgarren zezena. Zezen hori, geroago ere erori egin da, bigarren aldiz.

Zezen plazako sarreran ere dozena-erdi bat korrikalari erori dira. Hain justu, plazako sarreran erori dira, eta pilatu. Nolanahi ere, berehala jaiki dira, nahiz eta aurretik zezenek zapaldu egin dituzten.

Bi lagun eraman dituzte erietxera

Entzierroa amaituta, bi lagun eraman dituzte erietxera, biak traumatismoekin. 31 urteko madrildarra da bat, eta garezurrean du traumatismoa. Besteak, berriz, toraxean du traumatismoa, eta Castellongo (Espainia) 28 urteko gizonezkoa da.