Ostia sarea Senpereko Olha etxaldearen (Lapurdi) erosketa salatzeko ekintza egiten ari da. Adam makarroi denden jabea da etxea erosi duena, eta, goizean, Donibane Lohizunen (Lapurdi) dituen bi dendak blokeatu dituzte ekintzaileek. «Hor garen bitartean ez du nehork makarroirik erosten ahalko», adierazi du taldeak.
Duela zenbait egun kolektiboak jakinarazi zuen salmenta egina dela: 1.300.000 eurotan erosi du Adam gozotegiaren buruak, nahiz eta SAFER laborantza lurrak kudeatzeko egiturak 650.000 eurotan estimatu duen, prezio erdian.
Ekain hastapenetik, Senpertarren Kolektiboak, Ostia sareak, ELBk eta Lurzaindiak okupatua dute etxaldea. «Prezio espekulatzaile ikaragarria» salatzen dute. Nahiz eta «egunero eta amore eman gabe» okupatu duten etxaldea, aitortu dute okupazio lanak ez duela «emaitzarik izan». Ondorioz, salmenta «fermuki» salatu dute, eta okupazioan segitzeko xedez dira salmenta horren kontra borrokatzeko.