12.000 jarratzaileren aurrean egin du Laura Mintegi EH Bilduko lehendakarigaiak kanpainako ekitaldi nagusia, Barakaldoko BECen. Mintegirekin batera, Arnaldo Otegi izan da ekitaldiko protagonista nagusia. Espetxetik egindako adierazpenetan esan du espetxeak hustu eta kaleak bete behar direla. Elkartasuna adierazi die presoei eta haien senideei Otegik; bereziki, Josu Uribetxeberriari eta haien familiakoei.
Gaur bete dira hiru urte bera eta Bateragune auziko beste lauak atxilotu zituztenetik. Adierazi du, gainera, Espainiak ez duela egoera kudeatzen jakin, eta Rubalcabak behin ETAz esandakoetan oinarrituta adierazi du Londresek Irlandan bezala bukatzeko aukera izan duela, baina "Katalunia, Eskozia eta Quebecen bezalan" amaitzean aukeratu duela.
Hanka bat kalean eta bestea erakundeetan
Ekitaldia Mintegiren hitzaldiarekin amaitu da. "Ari, ari, ari, Laura lehendakari" oihu artean hartu dute BECen bildutakoek. Mintegik esan du EH Bilduk irabazi egingo duela urriaren 21ean, eta hori ona izango dela koalizioarentzat eta bere botoemaileentzat, eta baita gizarte osoarentzat.
"Hanka bat kalean eta bestean erakundeetan izango dugu", adierazi du. Independentziaren eta euskal presoak Euskal Herriratzearen alde oihu egin dute BECen izandakoek, eta ikurriña eta Nafarroako bandera ugari izan dira ekitaldian, EH Bildukoez gain.
Txaloak Periko Solabarrietarentzat
Ekitaldiaren hasieran, txalo zaparrada ugari jaso ditu Periko Solabarria ezker abertzaleko kide historikoak. Gainera, BECen izan dira, besteak beste, Juan Karlos Izagirre Donostiako alkatea eta Martin Garitano Gipuzkoako ahaldun nagusia. Arnaldo Otegiren preso zenbakia zuen kamiseta bat zeraman soinean Garitanok.
