Bake prozesua du ardatz Arnaldo Otegik Logroñoko espetxetik bidalitako gutunak. Nabarmendu du hiru direla uneotan negoziazioetarako puntu nagusiak: ETA epe motzean armagabetu eta desmilitarizatzea ahalbidetuko duen adostutako mekanismo bat zehaztea; preso politikoak askatzeko agitasmoa; eta biktima guztiak behar bezala aitortuko dituen plan bat. Horretarako, ordea, nahitaezkotzat jotzen du nazioartearen esku hartzea, "ezin baitugu espero Madrilek inolako urratsik egitea".
"Syrizak Grezian, Sinn Feinek Irlandan eta EH Bilduk Euskal Herrian rol garrantzitsuak jokatuko dituzte etorkizun hurbilean, bai herritarren eskubideen defentsan eta baita gure herriaren subiranotasunaren defentsan", dio mezuan.
Bide batez, gogorarazi du Espainiako Gobernuak gatazka konpontzeko mugimendurik ez egitea erabaki zuen bitartean EH Bilduk bere estrategia politikoa aldatu zuela, eta, hala, ETAk armak uztea lortu. "Ekimen hauek guztiak alde bakarrekoak izan dira. Madrilek behin eta berriz oinarrizko eskubide demokratikoak ukatzeak, ordea, euskal gizartearen gehiengoaren eta Madrilgo gobernuaren arteko nahitezko aurrez aurrekoa dakar".
Erabakitzeko eskubidea
Espainiako Gobernuaren jarrera kontuan izanik, "euskal gizartea bere kabuz mugitzen hasteko garaia" dela uste du Otegik. "Euren esku dagoen guztia egin behar dute bakearen erronkak eta erabakitzeko eskubidearekiko errespetua agertoki politikoaren erdira eramateko".
