Ibon Fernandezek esklerosi anizkoitza du, eta haren egoera okertzen ari dela ebatzita zigorraren etetea eskatu zuen Maritxu Paulus Basurco abokatuak, medikuaren txostenak froga gisa hartuta. Parisko dei auzitegiak ez zuen onartu eskaera, “baldintza batzuk betez gero” presondegian egon zitekeela argudiatuta. Ekainaren 22an, erabaki hori bertan behera utzi zuen Parisko Kasazio Auzitegiak. “Dei auzitegiak ebatzi zuen baldintza batzuk beteta, presondegian egoteak ez zuela Fernandez Iradiren osasun egoera kaltetuko, baina ez zuen ezer egin baldintza horiek betetzea bermatzeko; horregatik utzi du bertan behera Kasazio Auzitegiak”, adierazi du Paulus Basurcok.
13 urte daramatza Fernandez Iradik Frantziako presondegietan; 2010eko abenduan agertu zitzaizkion eritasunaren lehen sintomak. Bagoaz-ek salatu du, gaur egun 370 preso daudela Frantziako eta Espainiako presondegietan eta horietako hamar larriki eri direla. “Ibon Fernandezen galdearen aurka joanen litzatekeen epai batek, oinarrizko eskakizun humanitarioen aurka joateaz gain, Euskal Herrian masiboki eskatzen denaren aurka ere joko luke”, Emili Martin Bagoaz-eko kidearen hitzetan. Azaroaren 19an manifestazioa eginen dute Baionan; 17:00etan abiatuko da Euskaldunen plazatik.
